142 псалом

Господь, мыйын кумалмем кол, Шке чынлыкет дене мыйын сӧрвалымем пылышышкет нал, Шке виклыкет дене мыйым кол. Шке айдемет дене судышко ит шогал, вет Тыйын ончылнет ик илыше еҥат чыныш лектын ок керт. Вет мыйын чонем тушман поктыш, мыйын илышем мландышке тошкыш, шукерте колышо-шамыч гаеш шотлен, мыйым пычкемышке петырыш. Мыйын шӱлышем кӧргыштем шӱлыкаҥе, мыйын кӧргыштем шӱмем лӱдӧ. Тошто годсо жапым ушышкем налын, Тыйын чыла пӱрымет-шамычым, Тыйын чыла пашатым шонен, ушым пoгышым. Мый Тый декет кидем нӧлтал кумальым, мыйын чонем Тый декет вӱддымӧ мланде гае виктаралтын. Эй Юмо, мыйым вашке кол: мыйын шӱлышем пытыш. Шке чуриетым мый дечем ит савыре: уке гын, мый шӱгар вынемышке волышо гае лиям. Шке поро кумылетым мыланем эрдене эрак увертаре: вет мый Тыланет ӱшанышым. Эй Юмо, коштшаш корнем мыланем ончыкто: вет мый чонем дене Тый декет нӧлталтым. Господь, мыйым тушманем-шамыч деч кораҥде, вет мый Тый декет толынам. Шке эрыкетым ышташ мыйым туныкто: вет Тый мыйын Юмем улат. Тыйын поро Шӱлышет мыйым чынын мландышкыже намия. Господь, Шке лӱмет верч Шке чынет дене мыйым иландарет, мыйын чонем ойго гыч утарет. Шке поро кумылет дене тушманем-шамычым пытарет, мыйын чонем ойгаҥдарыше-шамычым чылаштымат пытарет: вет мый Тыйын кулет улам.

Добавить комментарий

Ваш e-mail не будет опубликован. Обязательные поля помечены *